好多人揀完地板料就以為地板已經冇野可以諗，其實咁樣諗就錯哂，因為地板鋪法呢有好多種，唔同鋪法會對整體效果影響好大，可能大家覺得好抽象，但係如果我用衫黎做比喻的話相信大家好快就會明。衣服上面嘅圖案係唔會直接影響件衫嘅功能，但係就會帶比人唔同嘅視覺效果，例如直間衫會令人覺得高啲、橫間會令人覺得闊啲，唔同嘅形狀、密度都已經有好唔同嘅效果，全部都係由視覺效果決定，地板嘅鋪法同衣服上面嘅圖案一樣，會令到間屋嘅空間感同埋格局唔同哂，以下就同大家介紹下比較常見嘅鋪法。

最常見嘅就係工字鋪，點解工字鋪會係最常見?第一個原因：平!，咁點解會平啲?因為師傅所用嘅時間同埋材料損耗亦都比較少。第二個原因：會令個環境感覺闊啲，原理就同間條衫一樣。

至於其他鋪法分別有斜鋪，其實都係工字,不過轉左45度

工字鋪同埋斜鋪會比較夾現代簡約風嘅設計。

然後係田字鋪，立體感強，適合一啲復古少少嘅設計。

人字型鋪適合嘅風格可以是現代簡約同北歐風。

魚骨鋪損耗高但係會有一種優雅嘅格調。

其實地板鋪法五花八門，重有好多不規則同混合配法，有啲設計會用地板鋪法黎劃分區域。想像唔到其實唔緊要，因為設計師會就住你想要嘅效果、喜歡咩風格而為你去決定，同時會有埋效果圖比你睇，想像力唔豐富嘅朋友亦都唔使怕啦。